Alt Liverpool í skeljasori

Fimm dystir hava verið í 19. umfari í Premier League í dag. Fyrr í dag vann Manchester United 2-1 á Manchester City. Klokkan 15 vóru fýra dystir. Liverpool tapti púra greitt 3-0 móti Brighton og grannarnir úr Everton er undir niðurflytingarstrikuni, eftir at hava tapt 2-1 á botnproppinum Southampton.

Liverpool var farna kappingarár eitt stig og ein sigur frá at vinna fýra steyp í sama kappingarárið. Tað verður ikki sama søga hetta kappingarárið, tí Liverpool tapti í dag 3-0 á útivølli móti Brighton. Eitt er at tapa – eitt annað er mátin tú tapur uppá, plagar at vera sagt um støðuna hjá einum fótbóltsliðið.

Brighton vísti seg frá síni góðu síðu við góðum spæli og vandamiklum álopum, men tað skerst ikki burdur, at Liverpool als ikki líkist sær sjálvum. Viðmerkjarar og ítróttarskrivarar kalla avrikið í dag fyri tað ringasta undir leiðslu av Jurgen Klopp. Liverpool liggur nú á 8. plássi og langt er upp til Champions League plássini.

Hitt felagið í Liverpool – Everton – er eisini í kreppu. Viðhaldsfólkini eru í øðini inn á eigararnar og leiðsluna. So nógv óð, at leiðslan í felagnum fekk boð um ikki at møta til dystin í dag, tí stemningurin var so hóttandi í samband við mótmælistiltøk.

Á vøllinum var trýst á bæði Everton og Southampton. Gestirnir liggja niðast, men vunnu í vikuni á Manchester City í Liga Cup. Tað tóku teir við á Goodison Park. Sjálvt um Everton kom á odda 1-0, so vunnu gestirnir 2-1 við tveimum málum frá James Ward-Prowse.

Everton og Southampton liggja nú undir niðurflytingarstrikuni saman við West Ham á 15 stigum. West Ham hevur eisini eitt vánaligt kappingarár og tapti 1-0 móti Wolverhampton. Fulham hevur sett yvirleggjaran fyri uppflytararnar, men Nottingham Forest hevur eisini slitið seg leyst av niðurflytingarstíðnum – fyribils – við einum sigri á Leicester í dag.