Úr Danmark gongur leiðin til Álands, har Nordens Institut hevur boðið teimum at halda konsert. Henda seinna konsertin verður týskvøldið 27. okt. í Mariehamn.
Aldubáran hevur rættiliga gjørt vart við seg síðani hon varð stovnað í 1995. Sjálvt um bólkurin bert hevur verið virkin í trý ár, hevur tað eydnast teimum at framt nógv ymisk tiltøk og fingið føroysk og eisini fleiri útlendsk tónaskøld at skriva til teirra. Tey eru fastur táttur á Summartónum og harafturat hava tey hildið Várkonsertir í Listaskálanum á hvørjum vári saman við føroysku tónaskøldunum.
Eisini uttan fyri landoddarnar hevur Aldubáran fingið avbera móttøku. Á fyrstu konsertini hjá teimum í ?95 í Keypmannahavn tók ummælarin hjá danska blaðnum Jyllands-Posten til, at »sjálvt um grunnarnir vóru tómir, sjálvt um tað fíggjarliga stóð í botni, so varð hetta ikki at merkjast í listini; hvørki í dygd ella í vavi. Her vóru spælimenn á hægsta stigi, ið als ikki vóru glataðir«.
Aldubáran er samansett av ungum føroyskum tónleikarum. Trý teirra virka á Musikkskúlanum í Havn, fýra teirra eru yrkistónleikarar í Danmørk, m.a. á Kgl. Leikpallinum. Harafturat eru tveir »royndarlimir«, Rúni Bæk, fiól, og Jógvan Zachariassen, fagott, ið búgva ávikavist í Ameriku og í Skotlandi. Tey spæla saman 3-4 ferðir um árið, fyrst og fremst nýggjan tónleik, men eisini tey vanligu klassisku verkini verða framførd. Harafturat luttaka tey í nógvum nýskapandi tiltøkum. M.a. skulu tey í heyst á heysti 99 hava framførslur við Hanusi Johansen í Norðurlandahúsinum, har bæði nýtt og gamalt tilfar hjá Hanusi verður klætt í nýggjan búnað. Spennandi verður.
Á ferðini til Danmarkar og Álands verður framførdur nýggjur føroyskur tónleikur av Kristian Blak, Sunleif Rasmussen, Kára Bæk, Edvard N. Debess og Tróndur Bogason.
Aldubáran er: Anna E. Klett, klarinett ? Andrea Heindriksdóttir, floytu ? Páll Sólstein, horn ? Øssur Bæk og Sámal Petersen, fiólir ? Hege Waldeland, sello ? Ólavur Jakobsen, gittara ? Jóhannes Andreasen, klaver.
