Gjáranáttina varnaðist norska loftverjan tvey fremmand flogfør 75 fjórðingar norðan fyri Senja. Tað vísti seg, at talan var um tvey russisk bumbuflogfør av slagnum Tu-160 ella Blackjack, sum tey verða kallað vestanfyri.
Norska loftverjan sendi F16-jagaraflogfør at fylgja teimum báðum russisku flogførunum. Tey flugu suður við norsku strondini og síðani vestureftir millum Bretsku Oyggjarnar og Føroyar, har bretsk jagaraflogfør hildu eyga við teimum.
Tu-160 hevur verið partur av russisku verjuni síðani 1987. Hetta er tað tyngsta hernaðarflogfarið, sum nakrantíð er bygt.
