Aeroflot var í 2019 – fyri koronukreppuna – sjeyndstørsta flogfelagið í Evropa við yvir 60 milliónum árligum ferðafólkum, men í hesum døgum hevur russiski flogrisin fingið skert flogið av tiltøkunum, sum eru sett í verk ímóti Russlandi aftur fyri innrásina í Ukraina.
Danski flogmiðilin check-in.dk skrivar, at flogforboð frá USA, Kanada, Bretlandi og ES hava gjørt tað trupult hjá russiska flogfelagnum, og tá leasingfeløg stríðast fyri at fáa flogfør síni aftur frá russisku flogfeløgunum, hevur tað verið ógjørligt hjá russisku flogfeløgunum at flúgva uttan fyri Russland.
Fyribils steðgaði Aeroflot 28. februar øllum rutum til 45 evropisk ferðamál, teirra millum úr Moskva til Keypmannahavnar, Oslo, Stokkhólm og Helsinki eins og ruturnar til USA, Mexico, Kuba og Dominikanska Lýðveldi. Men nú hevur Aeroflot valt at steðga allari altjóða flúgving frá 8. mars, sum er í morgin.
