Nógv hevur verið tosað um sigursrøðina hjá NSÍ, sum telur níggju dystir á rað. Tann fyrsti av teimum var í Runavík ímóti AB tann 4. mai, og síðani hava runavíkingar ikki helmað í, men bara vunnið og vunnið.
AB hevur hinvegin ikki havt ta stóru viðgongdina, tí í løtuni liggur liðið næstniðast við bara átta stigum fyri 13 dystir, harav ein er vunnin og fimm spældir javnir. Men merkisvert er tó, at av sínum seks heimadystum, hevur AB bara tapt ein – og argjamenn ætla ikki, at dysturin sunnudagin skal vera teirra heimatap nummar tvey og nummar 10 í sigursrøðini hjá NSÍ.
Spurningurin er so, um AB kann standa ímóti maskinuni hjá oddaliðnum, ið higartil hevur tikið øll hini liðini, eitt fyri og annað eftir.
Dysturin inni í Vika verður annars tann seinasti á núverandi graslíkisvøllinum hjá argjamonnum, tí mánadagin verður farið undir at leggja nýtt graslíki á, sum ætlandi verður klárt at taka í nýtslu eftir summarsteðgin.
