Amerikumaðurin, 89 ára gamli, Manfred Steiner, hevur nú rokkið dreymi sínum um at gerast doktari í evnafrøði. Aldurin helt honum ikki aftur, tá hann sum sjeyti ára gamal fór í holt við at fremja lívslanga dreym sín um at gerast evnafrøðingur.
Og nú kann hann rópa seg doktara í evnafrøði. Maðurin úr Rhode Island í USA ræður fólk til at fylgja sínum dreymum, og tá er tað líkamikið, hvør aldurin er.
- Fylg tínum dreymi, tí einaferð kann tað gerast ov seint, og tú angrar, sigur hann.
Dreymin um at gerast evnafrøðingur hevur Manfred Steiner heilt frá barni av. Tað var sum stórur smádrongur, at hann las um Albert Einstein og Max Planck. Men, eftir seinna heimsbardaga ráddi manna hansara honum til at lesa heilivág.
Í samrøðu við tíðindastovuna AP sigur hin 89 ára gamli, at mamma hansara helt, at fór hann heldur at lesa heilivág, fór tilveran hjá honum seinni í lívinum at gerast tryggari.
Manfred Steiner lurtaði eftir mammu síni, og í nógv ár hevur hann starvast sum professari í heilivági, men hann var kortini øll árini hugtikin av evnafrøðini. Tí fór hann sum 70 ára gamal at lesa á viðurkenda lærustovninum, Brown í USA.
Tað var tó ikki sørt, at professarin í evnafrøði á lærustovninum, Brad Marston, var eitt sindur skeptiskur, tá hin tá 70 ára gamli møtti. Professarin hevði havt næmingar í 40-árunum, men ikki næmingar, sum vóru 70 ára gamlir.
Men, tað tók ikki langa tíð, áðrenn Brad Marston sá, at nýggi studenturin var bæði nærlagdur og arbeiddi hart, og haraftrat hevði hann eina góða bakgrundsvitan sum professari í heilivági.
- Hin gamli hevði skrivað fleiri frágreiðingar um heilivág, enn eg hevði skrivað um evnafrøði. Hann hevði longu eina vísundaliga tankagongd, áðrenn hann byrjaði at lesa evnafrøði, sigur professarin á lærustovninum, Brown í USA.
AP skrivar, at hin 89 ára gamli hevur havt ymiskar heilsutrupulleikar undir lestrinum, men tað hevur eydnast honum at gerast doktari. Men, júst hvat Manfred Steiner fer at brúka sítt doktaraheiti í evnafrøði til, er ikki greitt.
- Men, eg leiti ikki eftir einum løntum starvi, sigur 89 ára gamli amerikumaðurin brosandi.
##med2##
