Tá vóru liðin 80 ár síðan teir fýra havnadreingirnir, Eskild Christiansen, Arne Ellingsgaard, Pauli Christiansen og Zacharias Poulsen, stovnaðu Skótalið Sigmunds Brestissonar tann 2. februar 1926.
Eini trý-fýra ár seinni keypti SSB síni fyrstu høli á Bakkahellu. Í hesum smáu húsunum høvdu skótarnir so skótaarbeiði sítt til í 1956, tá Skótahøllin við Havnará var liðug og gjørdist karmur um skótalívið í SSB.
Nógv fólk stukku inn á gólvið í Skótahøllini hósdagin, bæði núverandi og fyrrverandi skótar. Ein fyrrverandi skóti, Heðin Mortensen býráðsformaður, handaði SSB ein gávukekk upp á 25.000 krónur frá Tórshavnar býráð sum viðurkenning fyri tað arbeiði skótaliðið stendur fyri í høvuðsstaðnum.
Í dag eru umleið 130 skótar í fylkinum. Í nógv ár lá talið um 250, og tá talið var av tí mesta, høvdu meiri enn 300 úlvar, skótar og rovarar sína gongd í Skótahøllina.
Í samband við 80 ár stovningardagin var veitsla í samkomuhøllini í Hoydølum leygardagin 4. februar.
