Góða gongdin hjá Tryggingarfelagnum Føroyar er bremsað. Eftir fleiri ár við lutfalsliga stórum avlopi, hevur Tryggingarfelagið Føroyar fyrra hálvár í ár eitt hall upp á 7,7 milliónir krónur.
Tryggingarfelagið vísir á, at tað í fjør lækkaði tryggingargjøldini við upp til 20 prosentum. Samstundis hevur felagið fyrra hálvár havt fleiri miðalstórar skaðar og hesar útreiðslurnar eru størri enn fyri sama tíðarskeið í fjør.
Felagið skrivar í tíðindaskrivinum at hóast ilt er at meta um gongdina í tryggingarvirkseminum, so væntar leiðslan, at úrslitið við ársenda verður positivt.
