Sambært fyribils næmingatalvuni hjá Mentamálaráðnum eru 72 færri næmingar farnir í 1. flokk í nýggja skúlaárinum, 2013-14, enn seinasta skúlaár. Til samans eru 678 børn farin í 1. flokk hetta skúlaárið. Í 2012-13 var talið 750.
Tað skrivar Skúlablaðið á heimasíðuni.
Til samans 6.846 næmingar eru í føroyska fólkaskúlanum hetta skúlaárið afturímóti 6.894 seinasta skúlaár, altso 48 færri vísa fyribils tølini hjá Mentamálaráðnum.
– Væntandi hevur verið, at alt næmingatalið fór at verða minni í 2013-14, tí at fólkatalið sum heild er minkað tey seinnu árini í Føroyum, men ivaleyst man tað tykjast ræðandi, at 1. flokkur sum heild skal vera so nógv minkaður. Tað vil siga, at í dag – mánadagin 19. august 2013 – fara til samans 678 børn í skúla, í 1. flokk sammett við 750 seinasta skúlaár. So nógv færri børn skaka helst útlitini fyri skúlaárið 2014-15, um so er, at fólkatalið í landinum sum heild minkar áhaldandi, skrivar skúlablaðið.
Tøl hjá Hagstovu Føroya vísa, at 148 fólk vóru færri í 2012, til samans 48.097, í Føroyum enn árið fyri, í 2011, tá talið var 48.245.
Tó vaks fólkatalið í Tvøroyrar, Klaksvíkar og Vága kommunum. Tað komst av stórari tilflyting. Serliga sjónsk er stóra tilflytingin til Tvøroyar, takkað veri Varðin Pelagic. Kortini sæst hesin fólkavøkstur mest sum ikki á skúlabarnatalinum í Klaksvík, á Tvøroyri og í Vága kommunu. Viðurskiftini á Tvøroyri minna nakað um tey, sum valdaðu í gomlum døgum, hóast samferðsluviðurskiftini hava við sær í dag, at fólk flyta suður fyribils. Tey eru har arbeiðsvikuna og fara heimaftur um vikuskiftið. Børnini verða verandi heima.
Í landsins størstu kommunu er næmingatalið eisini minkað, 30 færri hetta skúlaárið, til samans 2341. Skúlaárið 2012-13 var talið 2371. Men í Havn er líkt til, at Skúlin við Løgmannabreyt farin avstað við næmingum úr hinum skúlunum í kommununi. 386 næmingar eru í Skúlanum við Løgmannabreyt nú sambært Mentamálaráðnum. Har vóru 363 næmingar seinasta skúlaár.
Í Kollafirði, sum er í Tórshavnar kommunu, fóru 13 næmingar fleiri í skúla mánadagin 19. august, 165, enn seinasta skúlaár.
