Um allan heimin eru meiri enn 40 milliónir fólk HIV-smittað ella hava fingið eyðkvæmi, og talið veksur støðugt.
- Hetta er ein umfarssótt, sum er verri enn tær, vit hava sæð fyrr, segði Peter Piot, sum samskipar eyðkvæmistiltøkini hjá ST, tá 14. altjóða ráðstevnan um eyðkvæmi varð sett í Barcelona týsdagin.
Í einari frágreiðing, sum ST legði fram á ráðstevnuni, stendur, at vandi er fyri, at eitt heilt ættarlið í Afrika fer til grundar orsakað av eyðkvæmi.
- Eyðkvæmi er ikki longur bara ein sjúka, men hetta snýr seg nú eisini um búskaparliga og sosiala menning og umframt trygd, segði Peter Piot. Hann legði afturat, at í Afrika kann umfarssóttin fáa álvarssamar avleiðingar fyri sjálva trygdina í øllum heimspartinum, tí hon forðar búskaparligari menning og elvir til hungursneyð.
Frágreiðingin hjá ST er óhugnaligur lesnaður. Í fjør kravdi eyðkvæmi tríggjar milliónir mannalív, harav 2,2 milliónir í Afrika. Fimm milliónir vórðu smittað í fjør. Síðani sjúkan varð staðfest fyrstu ferð í 1981, eru 20 milliónir fólk deyð av henni, og 14 milliónir børn eru vorðin foreldraleys.
Bara í londunum sunnan fyri Sahara-oyðimørkina eru 28,5 milliónir fólk HIV-smittað ella hava fingið eyðkvæmi. 70 prosent av teimum, sum fáa smittuna, fáa eisini eyðkvæmi, stendur í frágreiðingini.
ST heitir á tey ríku londini um at økja stuðulin til bardagan ímóti umfarssóttini. Uttan størri stuðul verður ógjørligt at forða einari enn størri vanlukku.
