Ein stórur partur av 1,1 milliarda íløgunum hjá Bakkafrost komandi fimm árini, er ein risastórur brunnbátur.
220 milliónir krónur verður mett, at brunnbáturin fer at kosta.
Hann skal byggjast í árunnum 2014-2015, og íløgurnar verða 110 milliónir krónur um árið hesi bæði árini.
Báturin er heilar 70 metrar langur og á stødd við stóru nótaskipini. Hann fer at taka heili 450 tons av laksi.
- Hetta verður ein munandi bati, tá vit skulu taka fisk, ikki minst um ein ringur skal tømast í einum skundi. Vanliga mugu vit stúva fiskin saman og hóva upp í brunnbátar, sum taka millum 40 og 60 tons, og tað kann taka heilt upp í eina viku at tøma ein ring, sigur Regin Jacobsen, stjóri á Bakkafrost.
Tað fer eisini at betra um arbeiðsgongdina, tí við nýggja brunnbátinum sleppa menn undan at snøra nótina saman, hvørja ferð fiskur er tikin.
- Ein ringur tekur umleið 450 tons av fiski, og tí fáa vit við nýggja brunnbátinum tømt ein heilan ring í senn, sigur Regin Jacobsen.
