Hetta valskeiðið hevur Jógvan Skorheim einsamallur umboðað Sjálvstýrisflokkin í býráðnum. Hann hevur verið í samgongu við Fólkaflokkin, og tað hevur borið næstformanssessin í býráðnum við sær.
Um Sjálvstýrisflokkurin kemur í lyklastøðu, so er møguleiki fyri, at Tjóðveldi, Javnaðarflokkurin og Sambandsflokkurin – um hann verður umboðaður – sum fara at bjóða Jógvani Skorheim formanssessin.
Í síni tíð var Sámal Petersen, sum seinni var bæði tingmaður og landsstýrismaður fyri Sjálvstýrisflokkin, formaður í sóknarstýrinum í Klaksvík.
Asbjørn Joensen lyfti arvin eftir Sámal Petersen. Áðrenn hann fór upp í landspolitikk, var hann formaður í sóknarstýrinum í Klaksvík í 1967 og 1968. 44 ár eru liðin, síðani Sjálvstýrisflokkurin síðst sat við róðrið í Klaksvík. Síðani hevur Fólkaflokkurin átt formanesessin í 20 ár, Tjóðveldi í fjúrtan ár, Javnaðarflokkurin í níggju ár og Sambandsflokkurin í eitt ár – í 1970.
So er spurningurin, um Jógvan Skorheim týsdagin kemur í støðu, har tað ber honum til at verða valdur til býráðsformann, og um hann fer at taka av, ella um hann tá heldur velur at halda fram í samgongu við Fólkaflokkin, sum er og sambært kanningini framvegis fer at verða nógv størstur í Klaksvíkar býráð.
