29 fólk doyðu í eini bussvanlukku á portugisisku oynni Maderia í Atlantshavinum í gjár.
Øll fólkini vóru úr Týsklandi, váttar talsmaður fyri týsku stjórnina.
##med2##
– Hetta eru ræðulig tíðindi, vit hava fingið av Madeira, sigur talsmaðurin.
Portugisiski forsætisráðharrin, António Costa, skrivar á Twitter, at hann hevur sett seg í samband við týska samveldiskanslaran, Angelu Merkel, fyri at vísa sína samkenslu.
– Tað er við stórari sorg, at eg frætti um vanlukkuna á Madeira.
– Eg havi víst Angelu Merkel mína samkenslu í hesi truplu løtu, skrivar hann.
Upprunaliga ljóðaði, at 28 vóru deyð, men læknar upplýsa, at ein kvinna er deyð av løstunum á einum sjúkrahúsi í Funchal, høvuðsstaðnum á Madeira.
27 onnur fólk eru særd.
##med3##
– Eg havi ikki orð, sum kunnu lýsa, hvat hendi, sigur borgarstjórin í býnum Canico, har vanlukkan hendi, Filipe Sousa, við sjónvarpsstøðina Sic.
Portugisiski forsetin, Marcelo Rebelo de Sousa, er farin til Madeira.
– Eg vísi mína sorg og samkenslu vegna alt tað portogisiska fólkið í hesi ræðuligu støðu og serliga fyri familjurnar hjá offrunum, sum eg havi frætt vóru tyskarar, sigur forsetin við portogisikt sjónvarp.
Samstundis upplýsa myndugleikar á staðnum, at tey deyðu eru millum 40 og 50 ára gomul.
Eitt sjúkrahús í Funchal váttar, at eingi børn vóru millum tey deyðu.
Filipe Sousa, borgarstjóri, upplýsir, at tað vóru 55 ferðafólk, ein ferðaleiðari og ein bussførari í bussinum.
Bussurin koppaði eftir øllum at døma niður av einum brøttum bakka, tá hann fór út av vegnum eystan fyri funchal. Sjónvarpsmyndir vísa tann hvíta bussin liggja á liðini í brekkuni nærindis smala vegnin.
Vanlukkan hendi umleið klokkan 18:30 lokala tíð í einum íbúðarøki.
Íbúgvar á staðnum siga, at veðrið var fínt, tá vanlukkan hendi. Myndugleikarnir eru við at kanna orsøkina til vanlukkuna.
Myndugleikar á staðnum upplýstu í gjárkvøldið sambært týska blaðnum Bild, at 17 menn og 11 kvinnur eru deyð. Tað var, áðrenn deyðstalið hækkaði til frá 28 til 29.
/ritzau/AFP
