Dánjal Højgaard
Túrarnir eru stuttir, nú svartkjafturin er fyri. Teir fóru úr Føroyum hósdagin í síðstu viku, fyltu lastina eftir einum samdøgri og vóru aftur í Føroyum mánadagin.
Christian í Grótinum hevur bíðað eftir tørni, at avreiða hjá Havsbrún í Fuglafirði. Teir væntaðu at sleppa framat á miðdegi í gjár.
Prísurin í Føroyum er í løtuni 50 oyru kilo. Hann hevur verið betri fyrr. Í 1998 t. d. var meðalprísurin fyri svarkjaftin nærum tvífalt so høgur - 95 oyru kilo.
Tað tekur umleið líka langa tíð at tøma Christian í Grótinum, sum at fylla hann. Tá ið tey tvey túsund tonsini eru landaði verður farið beina kós aftur á svartkjaftaleiðirnar fyri sunnan.
Hetta er besta fiskitíð til svarkjaftin, sum verður fingin bæði í ES-sjógvi og altjóða sjógvi. Svartkjafturin gongur norðureftir og kemur seinni í føroyskan sjógv.
