Ambitiøsa Manchester City hevur boðið ótrúligar tvær milliardir krónur fyri miðvallarleikaran hjá AC Milan, Kaka.
Milan fær smáar 900 milliónir, Kaka sjálvur aðrar 900 milliónir í løn, íroknað skatt. Talan verður um 110 milliónir krónur um árið, ella 2,1 millión um vikuna eftir skatt.
Aðrar 225 milliónir fara til millummenn og til Kaka fyri at skriva undir.
Hetta er nógv størsti sáttmáli nakrantíð. Næststørsti var um 400 milliónir, tá Zinedine Zidane skifti frá Juventus til Real Madrid, og nógv meiri enn gitta upphæddin, skuldi Christiano Ronaldo skift frá Manchester United til Real Madrid fyri 660 milliónir krónur.
Umboð fyri Manchester City fara mánadagin til Milano at hitta Kaka og pápa hansara, Bosco Leite.
City managarin, Mark Hughes sigur, at Kaka er verdur hvørt oyra av teimum tveimum milliardunum, sum hann fer at kosta City.
Tað er nú sambært enskum dagbløðum alt, sum bendir á, at Kaka innan stutta tíð verður at finna á liðnum hjá Manchester City, millum annað saman við landsmanni sínum, Robinho.
