Í Vinnumálaráðnum kann Johan Dahl rættiliga halda gildi, nú hann hevur hevur fingið flogfelagið sjálvt at rinda 72 milliónir krónur fyri at skvisa privatu partaeigararnar úr felagnum – og soleiðis hevur nationaliserað tjóðarflogfelagið.
Danski stjórin, sum stjórnar hesi nýggju, dýru strategiini hjá Johan Dahl er heldur ikki við sviðusoð. Ein stjóralønarhækking upp 100 prosent skuldi til. Jørgen Holme fekk 397.000 krónur í løn fyri teir 46 dagarnar, hann arbeiddi fyri felagið í fjør.
Og um hann ikki fær lønarhækkan í ár, so fer hann at fáa 2,4 milliónir í løn í ár. Tað er 200.000 krónur um mánaðin.
Soleiðis er Jørgen Holme hægst lønti almenni stjóri í Føroyum. Hann fær tríggjar ferðir so nógva løn, sum løgmaður skal fáa, um løgtingið fer at samtykkja uppskot løgmans um at geva sær sjálvum og landsstýrsifólki 30 prosent í lønarhækking.
So tá Jóhan Dahl øsir seg um, at almennar stjóralønir eru ov høgar – sum til dømis fráfaringarlønin hjá ALS-stjóranum, so passar tað ikki – í øllum førum ikki altíð.
– Men kanska vit fáa eitt betri føroyskt flogfelag við 72 milliónum færri á kistubotninum og einum dupult so dýrum stjóra?
