18 fólk eru funnin deyð, eftir at eitt ferðafólkaflogfar datt niður, tá tað skuldi fara á flog av flogvøllinum í Kathmandu í Nepal, skrivar ein lokalur miðil.
Lítla flogfarið, sum skuldi fara til Pokhara við 19 fólkum umborð, datt niður, tá ið tað fór av altjóða flogvøllinum í Kathmandu.
Hetta skrivar miðilin Kathmandu Post.
Flogskiparin í flogfarinum er eftir øllum at døma tann einasti, sum er eftir. Hann er koyrdur á sjúkrahús í skundi, boðar flogvøllurin frá.
Flogfarið fór út av flogbreytina og eldur kom í, sambært blaðnum.
Roykur sæst koma upp uttan fyri flogvøllin, og løgregla og sløkkiliðsfólk eru á staðnum.
Flogfarið er eitt hjá felagnum Saurya Airlines.
Óhappið hendi umleið klokkan 11 í morgunlokala tíð.
Flogfarið skuldi fara til Pokhara, sum er ein av best umtóktu ferðamannabýunum í Nepal.
Eygnavitni siga, at flogfarið kom úr sunnara enda av flogbreytini og at flogfarið knappliga flagsaði við veingjunum, sum raktu flogbreytina, og so kom eldur í flogfarið.
Tað næsta, sum hendi, var, at flogfarið datt niður í eina gjógv eystan fyri flogbreytina.
/ritzau/
