Ó hevur seinastu vikurnar søkt eftir ungum og frískum vertum til ungdómssendingina »Ó-beinleiðis«, ið verður á Rás2 í vár.
Ikki kann sigast annað enn, at stórur áhugi hevur verið fyri sendingini, tí vit hava fingið 15 seriøsar umsóknir. Uppaftur fleiri hava sett seg í samband við okkum, har tey ynsktu nágreiniligari upplýsingar um sendingina, sigur Hanus Samró, ið hevur tikið stig til sendingina.
Ungdómssendingin »Ó-beinleiðis« snýr seg í stuttum um at varpa ljós á lesandi og ungdómsrørslur í Føroyum. Alt frá næmingum, ið íðka seriøsan ítrótt ella tónleik og list til politisku ungmannafeløgini, sum fáa almennan pall, har møguleiki verður at royna seg í almenna rúminum.
Harafturat verður dentur lagdur á Setrið, har studentar fáa møguleikan at greiða frá kanningum, sum hava við føroysk viðurskifti at gera, eins og dentur verður lagdur á ymisku ungdómsrørslurnar í Føroyum.
Hetta verður eitt føroyskt alternativ til Ghetto Føroyar, sigur Hanus Samró.
Um vit skulu røkka endamálinum, er neyðugt við frískum og framfýsnum vertum, sum bæði skulu duga at undirhalda, men so sanniliga eisini at halda støðið á einum høgum og akademiskum støði.
Umsóknirnar verða viðgjørdar í vikuni, áðrenn umsøkjararnir verða bidnir um at koma til samrøðu. Um alt gongur eftir ætlan, verður ungdómssendingin »Ó-beinleiðis« at hoyra á Rás2 í mars.
Sendingin verður í samstarvi við Føroya Ungdómsráð og Fróðskaparsetur Føroya.
