Tær samanlagt 10 milliónir krónurnar býtir Sp/f Ítróttavedding soleiðis út millum tey trý, at Ítróttasamband Føroya fær góðar seks milliónir krónur, meðan Føroya Ungdómsráð og Mentamálaráðið fáa góðar tvær milliónir krónur í part.
Samlaða upphæddin hesa ferð, sum er tilsamans 10 milliónir og 71.000 krónur, er tann næststørsta, sum verður lutað út, síðani farið var undir samstarvið millum Sp/f Ítróttavedding og donsku veddingartænastuna í 1998. Bara í 2005, tá upphæddin var 10,2 milliónir, hevur hilnast betur.
Upphæddin, ið verður lutað út, skiftir eitt sindur frá ári til árs, alt eftir hvussu ídnir føroyingar eru at vedda og spæla hjá Danske Spil, og tískil hevur árið í fjør verið eitt av teimum bestu í so máta.
Øll hesi árini, síðani tað bar til at vedda í Føroyum, eru yvir 100 milliónir krónur lutaðar út til barna- og ungdómsarbeiði, og er hetta eitt stórt og týdningarmikið íkast til barna- og ungdómsarbeiði í Føroyum.
