Jay Beatty, sum hevur Down’s syndrom, slapp í hálvleikinum av dystinum millum sítt yndisfelag, Celtic, og Hamilton í bestu skotsku fótbóltsdeildini á vøllin at skjóta eitt brotsspark.
Málið, sum hann skoraði, bleiv tikið við í atkvøðugreiðsluna um besta málið í skotsku Premier League í januar, og nú atkvøðugreiðslan er liðug, er eingin ivi um, hvør hevur vunnið heiðurin.
Málið hjá Jay Beatty fekk ikki minni enn 97 prosent av atkvøðunum. Ongantíð áður hevur vinnarin av hesari kapping verið so greiður.
Omanfyri ber til at síggja upptøku, tá ið Jay umvegis sjónvarpið fekk boðini um, at hann hevði vunnið kappingina um besta málið í Skotlandi í januar. Eisini sendi yndisspælarin hjá honum, Georgios Samaras, Jay eina heilsan.
