Eftir lítið sannførandi fyrstu umfør tykist tað sum um, at 07 Vestur er við at fáa høvdið fyri seg.
Úrtøkan úr fimm teimum fyrstu umførunum var tríggir javnleikir og tvey tap. Nú tykist tað at vera gloppið.
Síðsta leygardag vann 07 Vestur ársins fyrsta sigur, tá ið tað eydnaðist at vinna 2-0 á heimavølli ímóti botnliðnum AB.
Í góðveðrinum í kvøld var 07 Vestur í Gundadali. Mótstøðuliðið var næstbesta liðið hjá B36, sum higartil í ár hevur staðið seg væl.
B36 hevði væl fleiri royndir ímóti málinum hjá gestunum, enn 07 Vestur hevði ímóti B36 málinum. Men 07 Vestur er á veg úr Gundadali og vestur við 2-1 sigri.
Stóri maðurin hjá 07 Vestur var aftur í kvøld Tór-Ingar Akselsen.
Sambært faroesoccer.com eru tað 23 ár síðani, at Tór-Ingar fyrstu ferð spældi á besta liðnum hjá samanlagda felagnum í Vágum, sum tá nevndist FS Vágar.
Í kvøld skoraði Tór-Ingar bæði málini í fyrsta útisigrinum hjá 07 Vestur í ár, og higartil í ár hevur hann skorað fýra mál.
Tíggju minuttir undan steðginum umsetti Tór-Ingar brotsspark til 1-0, og eitt korter undan leikloki økti hann eftir hornaspark til 2-0.
B36 minkaði um munin til 2-1 í tíðini, sum dómarin legði aftrat. Málskjútti var Jóhann Hansson Joensen.
B36 er á triðja plássi við 12 stigum, og 07 Vestur lyfti seg við sigrinum í kvøld av áttanda og fram á fimta pláss við 9 stigum.
Í áttanda umfari fær 07 Vestur týskvøldið vitjan av AB, og B36 skal spæla grannadyst ímóti HB.
