Forsetin, Volodymyr Zelenskyj, umrøður í talu til ukrainska fólkið i kvøld framgongdina, sum herurin hevur í krígnum móti russiska hersetingarvaldinum.
Uttan at fara út í smálutir, sigur forsetin, at framgongdin ikki er avmarkað til býin, Lyman í Donetsk, sum ukrainski herurin tók aftur frá russum um vikuskiftið.
Sambært Reuters kunngjørdi Volodymyr Zelenskyj leygarkvøldið, at strategiskt týdningarmikli býurin, Lyman, fult og heilt aftur er undir ukrainskum ræði.
Í kvøld frættist eisini, at ukrainskir hermenn hava framgongd í Kherson-regiónini.
Myndir í sosialum miðlum vísa ukrainskar hermenn í býunum, Khreshchenivka og Zolota Balka, sum hava verið undir russiskum ræði í fleiri mánaðir.
Sum skilst, eru fráboðaninar um býirnar, Khreshchenivka og Zolota Balka, enn ikki váttaðar av ukrainsku verjuni.
Men, Anton Gerashchenko, ráðgevi og fyrrverandi vararáðharri í ukrainska innanríkisráðnum er millum teirra, sum hava deilt myndir av ukrainskum hermonnum í nevndu býum.
Anton Gerashchenko sigur, at hann nú bíðar eftir einari almennari váttan frá ukrainsku verjuni um afturtøku av Khreshchenivka og Zolota Balka.
