Hósdagin kl. 16 letur listamaðurin Zakaris Heinesen upp framsýning í forhøllini í Snarskivuni á Vaglinum
Í gamla posthúsinum í miðbýnum húsast umframt postavgreiðslu eisini Snarskivan. Rúmsátta, ljósa og hugnaliga forhøllin verður eisini brúkt sum framsýningarhøli, har mong listafólk hava havt framsýning, síðani Snarskivan læt upp fyri nøkrum árum síðani.
Endamálið við hesum framsýningarhøli hjá mentamáladeildini er at sameina kommunala tænastu og listaskála, har listin hittir borgaran á alfaravegi, og nú upp undir jól verður forhøllin so karmur um eina listaframsýning hjá Zakarisi Heinesen.
Til hesa framsýning, ið er ein søluframsýning, hevur Zakaris arbeitt við vatnlitsmyndum.
