Vit í Maskinmeistarafelagnum høvdu ongantíð góðtikið at fingið ein sáttmála hjá einum øðrum fakfelag, sum onki hevur við okkara yrki at gera, smoygdan oman yvir okkum – og serliga ikki sáttmálan hjá einum “gulum” fakfelag, sigur Arnfin Bech, formaður í Maskinmeistarafelagnum
- Vit hava júst verið ígjøgnum fleiri truplar sáttmálasamráðingar vegna okkara limir, og altíð er tað fakliga fremst í huga, tá vit samráðast. Tí tað er fakið, sum er okkara samleiki, eins og tað eru fakligu førleikarnir, ið rættvísgera okkara sáttmálakrøv. Hetta ger seg sjálvsagt eisini galdandi hjá miðlafólki, og tí stuðla vit teimum av fullum huga í krøvunum um rættin at samráðst um egnan sáttmála í Kringvarpinum.
- Vit í Maskinmeistarafelagnum høvdu ongantíð góðtikið at fingið ein sáttmála hjá einum øðrum fakfelag, sum onki hevur við okkara yrki at gera, smoygdan oman yvir okkum – og serliga ikki sáttmálan hjá einum “gulum” fakfelag.
Tað sigur Arnfinn Bech, formaður í Maskinmeistarafelagnum, nú landsstýrið hevur sýtt at Føroysk Miðlafólki samráðingrrættin fyri limir felagsins í Kringvarpinum.
Hann heldur, at Starvsfelagið virkar sum eitt “gult” fakfelag, tá tað snýr seg um fleiri smá yrki ella fakøki á almenna arbeiðsmarknaðinum.
- Tey verða bara sleipað aftaná tí stóra feltinum og eiga ongan góðan, so Starvsfelagið fær limagjaldið, men ongin ger garð um tað fakliga. Tí er tað umráðandi, at yrkisfeløg ella fak-fakfeløg, sum eg plagi at kalla tað, sum útgangspunkt altíð sleppa at samráðast egna vegna, tá tey ynskja tað.
- Hetta ger seg kanska í serligan mun galdandi fyri journalist-yrkið í Kringvarpinum, tí journalistarnir har skulu sjálvsagt vera óheftir at øllum óviðkomandi áhugamálum, sigur Arnfinn Bech.
