Nú landskappingin er um at vera komin í helvt, kunnu fuglfirðingar staðfesta, at tað hevur gingist sera væl. Í løtuni er ÍF er á triðja plássi seks stig framman fyri B36, sum er mótstøðuliðið í Fuglafirði sunnudagin. Trýstið liggur á gestunum, tí fær havnarliðið ikki stig hesa ferð, verður mótbrekkan uppaftur tyngri í seinnu hálvu av kappingini.
ÍF fekk herfyri fýra sigrar á rað og tapti so tveir dystir, sum ímóti NSÍ heima og EB/Streymi úti, áðrenn liðið aftur komu á slóðina og nú hevur vunnið tveir dystir upp í slag. Samstundis var tað fyrstu ferð í 10 dystum, at B36 vann, tá tað síðsta sunnudag eydnaðist at fáa ein 1-0 sigur á AB.
Sostatt er talan um tvey lið, ið spæla undir fullkomuliga ymiskum fortreytum. ÍF hyggur uppeftir og veit av royndum fyri fáum vikum síðani, hvussu hugaligt tað er at sita á oddasessinum. B36, sum hesa ferð er uttan karantenurakta Jákup á Borg, má hinvegin stríðast fyri bara at halda seg oman fyri miðjuna.
