Dysturin hjá Norður Írlandi móti Italia í annaðkvøld verður hin seinasti við Nigel Worthington sum venjara.
Hann hevur fingið manga skoluna frá einum parti av fjepparunum eftir eina vánaliga undankapping.
Fyrrverandi Norwich-venjarin hevur havt ábyrgdina av Norðurírska landsliðnum í fýra og eitt hálvt ár, tó uttan at megna at kvalifisera liðið til nakra stóra kapping.
Soleiðis hevur liðið bert vunnið tveir av teimum seinastu 23 dystunum , tann eina móti Føroyum. Fimm av teimum 12 málunum, landið hevur skotið, eru somuleiðis móti Føroyum.
Sáttmálin gongur út á nýggjárinum, men Worthington hevur so valt at leggja frá sær eftir dystin í annaðkvøld.
Norður Írland hevði vónir um at náa EM endaspælinum til teir taptu móti Serbia á heimavølli og Estlandi á útivølli, og fríggjadagin máttu teir leggja rygg til eitt 2-1 tap á heimavølli móti júst Estlandi.
