West Ham vann í kvøld heldur yvirraskandi móti favorittunum úr Liverpool. Hóast sigurin var yvirraskandi, var talan tó um sannførandi avrik frá West Ham.
Frá byrjan av legði West Ham trýst á Liverpool liðið, og trýstið gav veruliga úrslit fyrstu løtuna, tí støðan aftaná 7 minuttir var longu 2-0 til West Ham.
Eitt korter áðrenn hálvleik kom Liverpool tó inn aftur í dystin, tá Raheem Sterling smekkaði bóltin í kassan, eftir at Mario Balotelli hevði lagt væl upp.
Tí var væntandi at Liverpool í seinna hálvleiki fór at leggja heimaliðið undir stórt trýst, men tað gjørdist ongantíð veruliga vandamikið fyri heimaliðið. Tað var í staðin West Ham, ið økti um leiðsluna, tá fáir minuttir vóru eftir.
Sostatt hevur Liverpool fingið eina heldur trilvandi Premier League byrjan. Sjónligt var eisini í kvøld, at tveir av stóru profilunum frá farna kappingarárið, Luis Suarez og Daniel Sturridge, manglaðu á Liverpool liðnum.
West Ham – Liverpool 3-1 (2-1)
1-0 Winston Reid, 2.
2-0 Diafra Sakho, 7.
2-1 Raheem Sterling, 27.
3-1 Morgan Amalfitano, 88.
