Leygardagin vórðu tríggir bátar hjá felagsskapinum Sea Shepherd seldir á uppboðssølu. Bátarnir vóru tiknir frá felagsskapinum í sambandi við teirra átøk ímóti grindadrápi fyri hálvum øðrum ári síðani.
Paul Watson, sum er leiðari fyri Sea Shepherd, er misnøgdur við, at bátarnir verða seldir, tí hann heldur, at bátarnir eru stolnir frá teimum, men hann sigur samstundis, at felagsskapurin hevur fingið nýggjar bátar ístaðin.
– Vit hava fingið nýggjar og betri bátar, og hvør veit, um bátarnir hava fingið skaða, meðan teir hava verið í varðveitslu hjá løgregluni, skrivar Paul Watson á Facebook vanganum.
Og hann hevur eini greið boð til tey, sum hava keypt bátarnar.
– Keypararnir skulu bara vita, at at Sea Shepherd roknar framvegis bátarnar sum ogn hjá felagsskapinum, sigur Paul Watson.
