Wagner-deildirnar hjá Jevgenij Prigozjin hava mist 30.000 hermenn, síðan Russland leyp á Ukraina hin 24. februar í fjør.
Tað siga tey á tíðindafundi í Hvítu Húsunum, og tað er tíðindastovan Reuters, sum í kvøld endurgevur talskvinnuna, Karine Jean-Pierre.
Wagner-deildirnar, sum berjast á russiskari síðu, hava sambært ukrainskum myndugleikum verið fyri stórum tapum um býin, Bakhmut.
Hildið verður, at deildirnar hjá Jevgenij Prigozjin hava mist nógv fólk í bardøgum við ukrainsku herdeildirnar.
Fyrr í dag skulu umboð fyri Wagner-deildirnar hava sagt, at teimum vantar útgerð til herfólkini.
Hvønn dag missa Wagner-deildirnar í hundraðatali av herfólki.
- Hetta tal kundi verið helvtina minni, um vit fingu vápnaveitingar, lóður og ymiskt annað, sum okkum tørvar, skulu umboð fyri Wagner hava sagt.
