Pettir av flogfari, sum pólfarari hevði við sær til Antarktis í 1912, er nú funnin aftur suðuri í kuldanum. Avstralskir granskarar halda seg hava funnið vrakpettir av einum flogfari, sum pólfararin Douglas Mawson tók við sær til Antarktis longu í 1912.
Jarðfrøðingurin og pólfararin, Douglas Mawson, stóð fyri tveimum kanningarferðum til Antarktis í byrjanini av 1900-talinum.
Í 1912 tók hann við sær eitt propelluflogfar. Flogfarið, sum varð bygt av bretska framleiðaranum Vickers í 1911 fekk eina harða lending á Antarktis longu í byrjanini av ferðini.
Hóast veingirnir vórðu skaddir, brúkti Mawson kortini flogfarið sum eina sletu við motori undir kanningarferðini.
Sum tíðin fekk, oyðilegðist motorurin á flogfarinum av nógva kuldanum.
Miðskeiðis í sjeytiárunum siga granskarar, sum vóru á Antarktis, seg hava tikið myndir av flogfarinum.
Men síðan tá skal eingin hava sæð flogfarið, fyrr enn nú vrakpettir eru funnin.
- Nú hava vit so funnið partar av flogfarinum, skrivar Tony Steward sambært tíðindastovuni AP á heimasíðu hjá granskarunum.
Gjøgnum trý summar hevur granskarabólkurin Mawson?s Hut Foundation leitað eftir flogfarinum á Antarktis.
