Evropisk lond arbeiða við "rættiliga nágreiniligum" ætlanum um møguliga at senda hermenn til Ukraina, tá ein friðaravtala verður gjørd ein dag.
Tað sigur forkvinnan í ES-nevndini, Ursula von der Leyen, í samrøðu við blaðið Financial Times.
Hetta er ein partur av teimum trygdarváttanum, sum ukrainski forsetin, Volodymyr Zelensky, fleiri ferðir hevur biðið um, sum liður í eini framtíðar vápnahvíld og friðarætlan.
Hetta kundi fevna um tíggjutúsundavís av útlendskum hermonnum, sum skuldu sendast til krígsrakta landið.
Sum støðan er nú, kundu evropeisk lond verið í fremstu røð í einum átaki í formi av hermonnum á staðnum. Hetta verður við hjálp frá USA í formi av skipanar- og stýrisskipanum, eftirliti og fregnartænastum, m.a.
Slíkar trygdarváttanir eru “absolutt alneyðugar” og eru stuðlaðar av USA, sum virkar sum “backstop”, sigur von der Leyen.
– Vit hava eina greiða ætlan og vit hava eina avtalu í Hvítu Húsunum, sigur hon við Financial Times.
– Trump forseti vissaði okkum um, at tað verður ein amerikansk nærvera sum partur av trygdarnetinum. Tað var sera greitt og varð lagt dentur á fleiri ferðir, leggur Ursula von der Leyen afturat.
Tríggir sendiharrar siga við Financial Times, at luttakararnir á einum fundi um Ukraina, sum fyrr í august varð hildin í Washington D.C., saman við amerikanska forsetanum, Donald Trump, væntandi hittast aftur í París hósdagin.
Millum stjórnarleiðararnar eru týski kanslarin, Friedrich Merz, bretski forsætisráðharrin, Keir Starmer, aðalskrivarin í NATO, Mark Rutte, og von der Leyen.
Franska forsetaskrivstovan vil ikki gera viðmerkingar til upplýsingarnar til blaðið.
Ursula von der Leyen sigur víðari í samrøðuni við Financial Times, at verjuleiðarar úr sonevndu "samgonguni av teimum fúsu" londunum, sum stuðla Ukraina, gjørdu "rættiliga nágreiniligar ætlanir" í farnu viku. Danmark er millum londini.
Ætlanirnar fevna eisini um "neyðugu elementini til eina virkandi hernaðaruppbygging", sigur ES-leiðarin.
- Tað krevur sjálvandi altíð eina politiska avgerð í hvørjum landi sær, tí at senda hermenn er ein tann týdningarmesta suverena avgerðin eitt land kann taka, leggur hon dent á.
Men sterk undirtøka er eisini fyri at gera nakað her og nú, leggur von der Leyen afturat.
- Tað gongur framá. Tað tekur veruliga skap, sigur hon við Financial Times.
/Ritzau/
