Donsku sosialdemokratarnir ganga nógv fram og flokkurin hevur nú yvirhálað Vinstra, og er, sambært nýggjastu veljarakanningini hjá kanningarstovninum Rambøll, størsti flokkur í Danmark.
Danski Fólkaflokkurin stendur til at missa seks pláss, í mun til somu kanning í august. Seinastu vikurnar hevur nógv rok verið um Danska Fólkaflokkin. Millum annað hevur innanhýsis klandur verið og málið um tekningarnar av Muhammed profeti, sum ungmannafelagið stuttleikaði sær við á eini legu, hava ikki gjørt støðuna betur.
Í sama tíðarskeiðið er Sosialdemokratíið farið fram við 5,5 prosentstigum. Flokkurin hevði fingið 27,9 prosent av atkvøðunum um val var nú, skrivar Jyllands Posten.
