Klaksvík: Norðoya Kunningarstova fer leygardagin at skipa fyri einum gongutúri úr Klaksvík og niðan á Katlarnar, har gamli tingstaðurin í Norðoyggjum var.
Tingstaðurin liggur á Borðoynni, 300 metrar omanfyri Árnafjørð, og her plagdu norðoyingar at hittast um vártingseturnar. Teir gomlu dugdu væl at velja sær stað, tí tingstaðurin liggur mitt í Norðoyggjum. Líka langt er at ferðast av Trøllanesi sum av Kirkju.
Ongar skrivligar keldur eru sum siga, nær tingstaðurin varð settur á stovn, men helst hava fyrstu norðmenninir, sum komu higar, brúkt somu skipan sum í Noregi.
Frásøgumaður við
Løgmaður møtti á vártingi fram til 1650, og eftir tað var tað fútin, sum hevði stóra orðið at siga, men eisini sýslumenninir høvdu stóran leiklut.
Tey, sum ælta sær við á forvitnisliga gongutúrin leygardagin, kunnu møta við býráðshúsini, haðani farið verður klokkan 13.00.
Gingið verður niðan við Ravnagili, norður eftir Svøðini, um Áarskarð og niðan á Katlarnar. Leiðari og frásøgumaður verður Símun Michael Poulsen.
Kostnaður fyri túrin er 50 krónur fyri vaksin og 20 krónur fyri børn. Íroknað prísin er søguligt yvirlit yvir hesa gomlu bygdagøtu og tingstaðin, og eisini verður okkurt leskandi at fáa, tá komið er á tingstaðin.
