Alternativ inntøka
Hvussu kann føroyska, altjóða skipaskrásetingin, vanliganevnd FAS, gerast eitt ískoyti til føroyska búskapin?
Hetta er evnið á eini almennari ráðstevnu, sum verður á Føroya Sjómansskúla í dag.
Tað er áhugafelagið, Skipating, ið skipar fyri ráðstevnuni, ið verður sett klokkan 10 í morgun og endar umleið klokkan 15.
Jørgen Niclasen, landsstýrismaður, fer at seta ráðstevnuna. Tey, sum annars fara at leggja fram, eru
Per Gulklett, føroyskur skipsmeklari í Keypmannahavn, Tórleivur Mikkelsen, umboðsmaður í Føroyum fyri útlendsk reiðarí, Gunnbjørn Joensen, reiðari í Hósvík, Heðin Poulsen á Skipaskrásetingini, Óla Hans Hammer Olsen á Skipaeftirlitinum, Regin Thomsen á Toll- og Skattstovuni og Petra Johnsdóttir Joensen á Almannastovuni.
? Skipating er eitt áhugafelag, sum hevur til endamáls at økja fakligan kunnleikan til sjóvinnuna, sigur Tórleivur Hoydal, skrivari í Skipatingi.
Hann sigur, at evnini, tey taka upp, eru eitt nú trygd, skipatøkni, útbúgving, umhvørvisvernd o.s.fr.
Í Skipatingi er Andras Joensen, leiðari á Norsk Veritas í Føroyum, formaður, Tórleivur Hoydal á skipasýninum er skrivari, og annars sita í nevndini: Kaj P. Mortensen, aðalstjóri í fiskimálastýrinum og Jón Magnussen, lærari á sjómansskulanum, Helgi Hansen, lærari á Maskinskúlanum.
Onnur lond, eitt nú Danmark og Noreg hava havt alttjóða skipaskrásetingar, og varð ikki okkurt líknandi tiltak sett í verk í Føroyum eisini, stúrdu myndugleikarnar fyri, at føroyskir reiðarar fóru at seta skipini undir fremmant flagg, fyri at lækka útreiðslurnar, tí tað er nógv bíligari at skráseta skip í altjóða skrásetingini, eitt nú spara reiðarar munandi í skatti og øðrum útreiðslum.
Føroyska altjóða skipaskrásetingin hevur yvir 10 ár á baki og tá settu summi stórar vónir til, at hon fór at gerast ein rættilig inntøkukelda hjá føroyska landskassanum.
Men tað vísti set ikki at halda stikk.
? Útlendsku skipini í hava verið fá. Eitt skifti vóru trý, norsk tangaskip í FAS, men tey fóru úr aftur og vórðu skrásett onkra aðrastaðni. Og nú er bara eitt útlendskt skip av týdningi í FAS, tað er norska tangaskipið, Bergina.
Torleivur Hoydal sigur, at endamálið við ráðstevnuni í dag er at fáa eina stungiðå út í kortið nakrar leiðir at ganga fyri at gera FAS skipanina til eitt ískoyti hjá føroyska búskapinum.
