Tað heldur Høgni Hoydal, formaður í Tjóðveldi.
– Vit royna at fáa val. Vit ynskja val, og vit eru ótrúliga fegin um, at hetta málið varð samtykt, tí tað kann flyta nógv í føroyska samfelagnum. Men hetta málið var bara ein dropi í hjá samogngu, har tey langt síðani hava mist málið úr eygsjón, um tey hava havt nakað mál, sigur Høgni Hoydal.
Hann vísir á, at Fólkaflokkurin hevur býtt landsins ognir út til síni, og Jenis av Rana hevur eisini bara sitið og arbeitt fyri nøkur serstøk áhugamál, og Sambandsflokkurin hevur bara sitið, sum hann hevur sitið.
– So hvat skal hendan samgonga sita til, spyr Høgni Hoydal.
– Nú má fólkið sleppa at tala.
Spurdur um støðan ikki kann samanberast við 2011, tá Tjóðveldi for inn og hjálpti Sambandsflokkinum og Javnaðarflokkinum, eftir at Fólkaflokkurin fór úr samgonguni, sum tá sat, sigur Høgni Hoydal, at kann als ikki samanberast.
– Nei, tí tað var ein serstøk støða, tá vit í veruleikanum bara søgdu tað, at Fólkaflokkurin fór út, og makrelurin lá í hálvum gekki, so valdu vit bara fara inn og fáa tað avgreitt. Tað kann als ikki samanberast við hesa støðuna, sigur Høgni Hoydal.
– Eftir mínum tykki, so verður tað bara verri og verri fyri hvønn dag, sum hendan samgongan situr, fyri at sjálvstøðugt og rættvíst samfelag í Føroyum. So fyri okkum er støðan púra greið, fólkið sleppa at tala, sigur Høgni Hoydal.
– Samgongan hevur sitið í tvey ár, og tað hevur verið valdsmisýtlsa frá byrjan til enda hjá flestu landsstýrisfólkum og hjá flestu tingfólkum, og tað gongur bara til eitt vist. Teir sita og býta á skinnunum, og tá teir ikki halda, at har er meira at býta, og hvat er so eftir. Og eg haldi, at tað var tað, vit sóu í gjár.
Høgni Hoydal sær ikki fyri sær nakra alternativa samgongu, og hann heldur ikki, at tey verið rætt at gjørt tað.
– Sjálvandi koronustøðan kann krevja, at okkurt skal avgreiðast, so har hava vit eina ábrygd. Men eg haldi, at tað eisasta rætta er, at Føroya fólk sleppur at tala, tí tað er hent so nógv síðani seinasta val, sum fólk eiga at sleppa at taka støðu til: So fyri mær er støðan so greið.
– Samgongan hevur havt eitt eyðkenni, og tað er at gera mismun. Bæði í vinnupolitikki, men ikki minst viðvíkjandi rættindi hjá samkyndum og børnum teirra. og innan fyri skattapolitikk. Nú fara vit til val upp á at gera mun fyri fólkið.
– Eg dugi ikki at síggja, at nakar hevur áhuga í at hetta heldur fram, uttan tey, sum sita og tvíhalda um valdið í løtuni.
Høgni Hoydal sigur, at løgmaður hevur ikki biðið Tjóðveldi um samráðingar.
– Men vit skulu minnast til tað, at løgmaður hevur ongantíð í allari koronutilgongdini roynt veruliga at fingið andstøðuna við at viðgera nakað mál. Eitt annað dømið er hetta við barnakoppseting, sum bara varð lýst av landsstýrismanninum í heilsumálum, kaj Leo Holm Johannesen.
– Eg haldi, at hvørki tað parlamentariska fólkaræðið ella tað veruliga fólkaræðið, har fólk hava ávirkan, hevur fungerað undir hesi samgonguni. Og um hann veruliga vildi tað, so kundi hann havt samráðst við andstøðuna um okkurt, men tað hevur hann ikki gjørt. Teir hava sitið sum hesir tríggir høvdingar og býtt í millum sín.
– Einasta loysnin er val. Men velja tey at halda fram, so verður tað ein skinklut samgonga, tí Johan Dahl hevur boðað frá, at hann er ikki partur av samgonguni.
Høgni Hoydal sær fyri sær, at løgmaður ásannar, at hetta gongur ikki, tó ikki fyrr enn eftir nýggjar, og skrivar út val.
– Annars má tað samtykkjast í tinginum, sigur Høgni Hoydal, formaður í Tjóðveldi.
