UMHVØRVIÐ
Hans Kárason Mikkelsen
hans@sosialurin.fo
Fríggjadagurin 28. og leygardagurin 29. apríl eru umhvørvisdagar í
Tórshavnar kommunu.
- Vit fara at vísa á, hvussu mann skal rudda, og vit fara at royna at fáa allar partar við. Og niðri á Skálatrøð hava vit nakað nýtt, nevniliga kompost. Tað vil siga, at hevur mann greinar har heima, so kann mann fara oman og fáa tær knústar og síðani fáa tær heimaftur við í sekki, sigur Heðin Mortensen.
- Vit meta, at her skal nakað gerast. Vit hyggja eisini frameftir, bæði við heilsuumhvørvispolitikkinum og orkupolitikkinum.
- Hetta hevur mangla undanfarin ár. Í øllum førum hevur mann ikki lagt nóg stóran dent á tað, og tí fara vit komandi tíðina at brúka nógva orku upp á hetta her. Tað er umráðandi, at Tórshavnar kommuna gongur á odda á hesum økinum, soleiðis at borgarar kunnu síggja eitt reint umhvørvi og kunnu ferðast úti í náttúruni og síggja, at vit royna at ganga væl um, sigur Heðin Mortensen.
- Vit ætla eisini at fáa stovnar, barnagarðar, vøggustovur, skúlar og frítíðarfeløg upp í hetta arbeiðið. Tað er eisini ætlanin, at tá mann søkir um stuðul frá kommununi, tá skal mann líkasum arbeiða fyri og gera nakað fyri tann stuðulin, sum mann fær. Tað verið seg at rudda, planta trø, og annað.
- Vit vóna, at landsins mynduleikar fylgja við, tí har meta vit, at vit ganga á odda, sigur Heðin Mortensen, borgarstjóri í Tórshavnar kommunu.
--
Myndatekstur: Umhvørvisdagar verða í Tórshavnar kommunu fríggjadagin og leygardagin
Mynd: Bárður Lydersen
--
FAKTA
Planta eitt træ
Skálatrøð verður miðdepilin í Umhvørvisdøgunum. Leygardagin frá 10.00-15.00
verður umhvørvistiltak á parkeringsplássinum. 500 plantupakkar verða
útflýggjaðir á Skálatrøð, inntil kl. 15.00 ella til uppi er.
Borgarar í Tórshavnar kommunu undantikið Kollafirði, Nólsoy og Hesti hava
møguleikar at fáa pakkarnar. Planturnar eru álíkar teimum seinasta ár.
Eingin uppskriving verður frammanundan, og planturnar verða útflýggjaðar á
staðnum.
Plantur til bygdirnar Kollafjørð, Nólsoy, Hest, verða útflýggjaðar hjá
umsjónarmanninum á staðnum leygardagin frá kl. 10.
Greinar verða knústar
Tórshavnar kommuna hevur keypt maskinu til at knúsa greinar. Maskinan verður
á Skálatrøð, og borgarar í kommununi fáa høvi at koma við greinum, sum verða
knústar. Talan skal verða um einans greinar og ikki mold og gras. Úr maskinuni kemur stroyggj, sum fólk fær við heim aftur at brúka í urtagørðum.
Sankutøð
Sankutøð (kompost), sum gerst alt betri umtókt, er ein frálíkur mátið at
endurny´ta. Á Skálatrøð verður høvi at síggja íløt til sankutøðan, eisini
verður fólk á økinum, sum fer at greiða frá um hetta.
Lort í býin
Nýggju hundalortaposarnir verða eisini at fáa á Skálatrøð. Brúktu posarnir
kunnu hóskandi koyrast í eitt av teimum 56 nýggju ruskíløtunum, sum kommunan
setur upp kring býin í hesum døgum.
Umhvørvisgongutúrar
Sunnudagin 1. mei verður triðji umhvørvisdagurin. Hesin dagur verður
gongudagur. Í samstarvi við kunningarstovuni verður skipa fyri fýra
gongutúrum í kommununi. Til ber hjá øllum sum orka at ganga at luttaka.
Kelda: Skriv frá Tórshavnar kommunu
