- Støðan í Kollafirði er ræðandi.
Jákup Dam er kollfirðingur og limur í Tórshavnar býráð. Og nú vil hann hava býráðið at leggja seg selarnar fyri at venda gongdini í Kollafirði.
Á fundi hóskvøldið samtykti Tórshavnar býráð at fara undir at gera barnagarð í Kollafirði og hann verður liðugur næsta summar.
Men á býráðsfundinum staðfestir Jákup Dam, at gongdin í Kollafirði er so ræðandi, at tað skal meiri til fyri at venda gongdini.
Hann er eisini lærari í Kollafirði og hann vísir á, at hesi seinastu 10 árini er talið á skúlabørnum fallið ein triðing, ella heili 32 prosent og er nú komið niður á 117 børn.
- Sum støðan er nú, lýkur Kollafjarðar skúli ikki longur treytirnar fyri at vera fult árgangsbýttur skúli, sigur hann.
Hesi seinastu 10 árini er eisini fólkatalið í Kollafirðið fallið yvir 100 fólk og er nú komið niður á 900 fólk, samstundis sum at fólkatalið í øðrum bygdum har um leiðir, veksur.
Jákup Dam sigur, at orsøkin til barnatalið er fallið so nógv, er tann, at tað eru færri og færri barnafamiljur í bygdini.
Tær eru heldur fluttar í aðrar kommunur at búgva og orsøkin til tað, er tann einfalda, at tað ber ikki til at fáa grundstykki at byggja á í Kollafirði.
Hetta er ein gongd sum má vendast, sigur Jákup Dam.
- Tað sigur seg sjálvt, tá ið einki grundstykki er at fáa, ber heldur ikki til at fáa fólkatalið at veksa.
Tí staðfesti hann á býráðsfundinum, at hetta er eitt mál, býráðið má gera nakað við.
Men á býráðsfundinum hóskvøldið varð upplýst, at arbeitt verður við málinum.
Í Kollafjørði er tað mesta av jørðini ogn og avleiðingin av tí er, at tað er ringt at fáa fatur á jørð. Útlit vóru til at fáa jørð at stykkja út, men eigarin og býráðið kundu ikki semjast um prísin og tískil datt tað niðurfyri.
- Vit hava skyldu til at halda prísinum niðri, tí rinda vit yvirprís fyri jørðina, verða grundstykkini bara tað dýrari at byggja á, segði Tróndur Sigurðsson, formaður í byggi- og býarskipanarnevndini hjá býráðnum.
Men nú verður samráðst um eitt annað stykki, har tað er pláss fyri 24 grundstykkjum og Tróndur Sigurðsson vónar, at tað fer at bera á mál hesa ferð.
Les eisini: Gera nú barnagarð í Kollafirði til 80 børn
