Brúgvin um Sandá er sera vánaliga handfarin av Tórshavnar Kommunu, sigur stjórin í Articon, sum í oktober 2012 bjóðaði sær at gera arbeiðið fyri 55 milliónir krónur.
Meðan Articon á heysti í 2012 lá væl fyri í kappingini um stóru verkætlanina at gera brúnna um Sandá, so er fyritøkan nú at kalla úti úr myndini.
Tá tilboðini vórðu latin upp í oktober 2012, ljóðaði tilboðið frá Articon uppá 54,7 milliónir krónur. Í tilboðnum vóru eisini rundkoyringar báðumegin við brúnna, umframt tilkoyringarvegir.
– Tá valdi Tórshavnar Kommuna at diskvalifisera øll tilboðini. Tað vóru vit sera misnøgd við, sigur Jón Sigurdsson.
Stjórin í Articon heldur samanumtikið lítið um, hvussu málið við brúnni um Sandá er handfarið.
– Vit bjóðaðu okkum til gera alt arbeiðið fyri handan prísin. Tað var eingin ivi um, at vit vildu hava arbeiðið. Tá vit geva tilboð leggja vit okkum altíð eftir at bæði prísur og tíðarætlan halda, sigur Jón Sigurdsson avgjørdur.
Hóast tað seinni er ført fram, at neyðugt er at brúka munandi meira grót til verkætlanina enn upprunaliga mett, so fær tað ikki stjóran í Articon at broyta støðu.
– Eg trúgvi einki uppá, at hetta hevði broytt prísin stórvegis. Tá bjóðaðu vit uppá arbeiðið í eini totalenterprisu, og vit skuldu nokk funnið eina loysn á tí eisini, sigur Jón Sigurdsson.
Hesaferð bjóðar hann uppá eitt liðugt projekt, ið Landsbyggifelagið og Selmar Nielsen arkitektur hava staðið fyri. Og tað broytir støðuna grundleggjandi:
– Nú bjóða vit bara upp á tað, sum er boðið út. Seinast høvdu vit okkara egna projekt at arbeiða út frá, sigur Jón Sigurdsson.
Tórshavnar Kommuna bað í vár tær tríggjar fyritøkurnar, sum vóru inni í myndini í fyrru útbjóðing, um at lata nýggj tilboð inn. Hesaferð skuldu fyritøkurnar bara bjóða uppá arbeiðið at gera sjálva brúnna, ið kommunan sum nevnt hevur latið teknað. Hesaferð er tilboðið frá Articon 74,5 milliónir krónur. TG-Verk bjóðar sær til at gera brúnna fyri 83,5 milliónir, meðan J & K. Petersen eigur nógv lægsta tilboðið og bjóðar sær til at gera arbeiðið fyri 59,8 milliónir. Allar upphæddirnar eru uttan meirvirðisgjald.
Les eisini: Brúgvin 15 milliónir dýrari
Stjórin í Articon vísir á, at í hesum bundna tilboði er talan um nógv meira grót, stál og betong. Og tað dýrkar hansara tilboð.
Hóast Articon ikki ger meira við brúnna um Sandá, ásannandi at teirra nýggja tilboð liggur 15 milliónir omanfyri tilboðið hjá J&K, so ilskast stjórin inn á handfaringina:
– Vit brúktu nógva tíð, orku og pengar til at gera fyrra tilboðið. Vit vildu hava hatta arbeiðið, og gjørdu tí nógv burtur úr at bjóða, men síðani varð alt annulerað. Hatta var ein góður ordri at fáa, og tí harmast vit um, hvussu kommunan fór við innkomnu tilboðunum, sigur Jón Sigurdsson.
Í februar skrivaði Tórshavnar Kommuna undir sáttmála við sp/f Andrias Berg, sum ger báðar rundkoyringarnar og tilhoyrandi íbindingar báðumegin brúnna fyri tilsamans 9,7 milliónir krónur. Tá lægsta tilboðið at gera sjálva brúnna nú er 59,8 milliónir, so er samstundis greitt, at nýggja vegasambandið millum Havnina og Argir fer at kosta 70 milliónir krónur.
