Tað er vorðið eitt umtaluevni í Noregi, at fótbóltslandslið teirra á nýggjasta styrkilistanum eru aftanfyri sjálvastu Føroyar. Føroyar eru nummar 77, meðan Noreg eru nummar 86.
Dagbladet hevur í dag fingið orðið á Gilla Rólantsson, sum spælir í norska Brann. Hann sigur við blaðið, at Føroyar høvdu megnað at vunnið ímóti Noregi.
- Um vit høvdu spælt ímóti Noregi á heimavølli í morgin, so høvdu vit vunnið tykkum. Tað vænti eg heilt avgjørt, sigur Gilli í samrøðu við Dagbladet.
- Noreg hevur teir betru spælararnar í teimum betru deildunum, men teir hava verið vánaligir í síðstuni. Vit arbeiða knallhart, standa væl á vøllinum og Noreg passar væl til okkara spælistíl, útgreinar hann.
Norðurlond á heimsstyrkislistanum:
21. Ísland
34. Svøríki
51. Danmark
77. Føroyar
86. Noreg
97. Finnland
