WAP, sum er ein stytting fyri Wireless Application Protocol, er so smátt við at vinna frama í londunum kring okkum, og í Danmark hava wap heimasíður verið tøkar í nakrar mánaðir.
Eitt nú ber til at lesa styttar greinar hjá dagblaðnum Aktuelt á wap-fartelefonum, og Lån & Spar Bank bjóðar viðskiftafólkunum at síggja kontoavrit, flyta pening millum egnar konti og annað á wap-fartelefonum.
Donsku bankarnir hava eisini ætlanir um at lata viðskiftafólkini gera vanligar flytingar á wap-fartelefonum um stutta tíð.
Skeiðtilmeldingar
Á wap-heimasíðuni hjá VIT fæst ein listi yvir tey skeið, sum VIT-stovan bjóðar, og gjørligt er eisini at tekna seg gjøgnum fartelefonina.
Wap-heimasíðan hjá VIT er at finna á adressuni wap.vit.fo
VIT, sum annars eisini er kent fyri at gera framkomnar heimasíður, fer í næstum at leggja seg eftir at gera fleiri wap-heimasíður fyri viðskiftafólk.
Sambært Reidar Ole-Jacobsen frá VIT, er tað í flestu førum bara talan um at umleggja verandi heimasíðu til wap-tøknina, men alt má gerast við skili, soleiðis at tað ikki gerst neyðugt við dupultum viðlíkahaldi.
Wap-fartelefonir
Um wap-fartelefonir kann sigast, at tær eru serligar við tað at rúturin á fartelefonini er nógv størri enn vanligt - og so hevur fartelefonin eina rulli-mús.
Allir teir størru framleiðararnir av fartelefonum gera eisini wap-fartelefonir, og í Føroyum fáast tær eitt nú hjá JS-Radio í Handilskjarnanum.
Haðani frættist, at nógvir føroyingar longu hava ognað sær eina slíka.
Við tí framgongd, sum bæði internetið og fartelefonirnar hava havt í Føroyum seinastu árini, kann roknast við, at wap ? eins og í grannalondunum ? fer at vaksa í stórum her heima í komandi tíðum.
