Í roynd og veru fingu vit ongantíð møguleikan at fáa fatur á grótinum úr Eysturoyartunlinum.
Tað sigur Jóhannus Danielsen, borgarstjóri í Nes Kommunu.
Sum heild váttar hann tað, starvsfelagir hansara, Borgarstjórin í Runavík, Tórbjørn Jacobsen, segði í KvF,og tað, Artur Johansen, borgarstjóri í Sjóvar Kommunu, segði her á heimasíðuni, søgdu um grótið.
Teir søgdu báðir, at tær tríggjar kommunurnar, Sjóvar, Runavíkar og Nes kommuna, vóru áhugaðir í at fáa alt grótið úr Eyturoyartunlinum, eisini grótinum ið kom upp á Hvítanesi.
Les eisini: Vit vildu hava alt grótið - og rinda fyri flutningin
– Vit vóru komnir á leið í samráðingunum um grótið, men treytin frá tunlafelagnum var alla tíðina, at vit skuldu sjálvi rinda fyri flutningin, sigur borgarstjórin í Nes Kommunu.
– Vit fingu at vita, at tað var leisturin hjá tunlafelagnum, og tað lá ongantíð nakað annað í kortunum enn at vit skuldu rinda allan flutningin. Og vit skuldu samstundis eisini rinda fyri at gera eina atløgubryggju á Hvítanesi, haðani grótbátur kundi sigla inn á Skálafjørðin við grótinum
Jóhannus Danielsen sigur, at sjálvur helt hann, at tað varð ov dýrt fyri Nes Kommunu, men so hoyrdu tey einki aftur og málið fánaði sostatt burtur.
– Men nú mugu vit ásanna, at leisturin er broyttur, og at Tórshavnar Kommuna fær grótið, og sleppur undan at rinda ein part av flutninginum.
– Vit fingu ongantíð nakað annað tilboð enn at vit skuldu rinda fyri allan flutningin, og tískil vóru heldur ongantíð samráðingar ímillum okkum og tunlafelagið um tað, sigur Jóhannus Danielsen.
