Tjóðveldisflokkurin stendur sambært veljarakanningini hjá Gallup Føroyar til at endurvinna fólkatingsumboðið, men tað er sera lítil munur á Tjóðveldisflokkinum og Fólkaflokkinum.
? Tað er merkisvert, at Fólkaflokkurin stendur seg so væl í veljarakanningini, men eg rokni við, at vit fara at hava munin á teimum á valinum, sigur Torbjørn Jacobsen.
? Tá ið Fólkaflokkurin samstarvar við Sambandsflokkin, plagar hann at eta burtur av Sambandsflokkinum, meðan Tjóðveldisflokkurin plagar at fáa av tí betra endanum í Fólkaflokkinum, teimum mest fullveldissinnaðu.
Munurin verður størri
Persónsstríðið, sum hevur verið millum Høgna Hoydal og Torbjørn Jacobsen, tykist ikki nerva møguleikarnar hjá Tjóðveldisflokkinum fyri at fáa fólkatingsumboð í fýra ár afturat.
? Úrslitið í veljarakanningini kemur ikki so óvæntað á meg. Tað er nakað síðani, at eg segði, at Javnaðarflokkurin fer at fáa ein ágóða av løgmanseffektini, meðan vit sum stóru andstøðuflokkurin eisini fara at standa okkum væl, sigur Torbjørn Jacobsen.
? Tað er sera tætt í veljarakanningini, men eg vænti, at Tjóðveldisflokkurn fer at fáa annað umboðið, og at munurin verður størri enn í veljarakanningini.
