Heðin Samuelsen
Ein av stóru syndarunum til fíggjarskrædlið í 1980’unum, fyrrv. Føroya løgmaður Pauli Ellefsen – sum síðani einaferð í síðstu øld hevur krógvað seg fyri almenninginum - roynir í grein í Sosialinum um visión 2015, at snúgva sær undan medábyrgd.
Hann lessar alla ábyrgd yvir á fíggjarmálaráðharran, sum sat í samgonguni eftir hansara egnu frá 1980-84. Óivað stavar nógv av skuldini frá samgonguni 84-88. Men eisini var fíggjarmálaráðharrin so óumhugsin at grava fram alla gamla skuld, sum ábyrgdaleys landsstýri høvdu hongt um hálsin á føroyingum. Heldur enn at farið í hvønn krók og drigið óskrásetta skuld fram, átti hon kanska at havt gjørt sum Pauli sjálvur, meðan hann sat sum løgmaður: Feia inn undir gólvteppið og so latið tey, sum komu aftaná eiga upptakið.
Her var fíggjarmálaráðharrin ikki nóg snildur og kom tí eisini at taka ábyrgd av skuld, sum Pauli
Ellefsen átti.
Men hann heldur kanska, at føroyingar eru so stuttmintir, at teir hava gloymt - bert fyri at nevna okkurt av hansara nógvu brøgdum - tey 12-15 farmaskipini hann bjóðaði smáinvestorum við bæði landkassastuðli og -veðhaldi, og sum hesir og landskassin bløddu fyri í nógv harrans ár. Tað var fyrst og fremst løgmaður Pauli Ellefsen og hansara landsstýri, sum í tíðarskeiðnum 1980 – 1984 sleptu landskassaveðhaldini til skip á “glíðibreytina”, og sum at enda eisini vóru ein stór orsøk til, at alt samfelagið kollsilgdi í 1992.
Tá Pauli nevnir, at blokkstuðulin fór upp í royk í 80’unum, hevur hann púra rætt. Danski blokkstuðulin fór snøgt sagt allur sum hann var, undir heitinum “stuðul til fiskivinnuna” upp ígjøgnum skorsteinin á einum alt ov stórum og órationellum fiskiflota. Og hevði tí lítlan og ongan positivan týdning í búskapinum.
Síðani fer hann eftir fullveldislandsstýrinum og tvíheldur um, at føroyingar ikki tóku undir við hesum.
Jú somikið stór varð undirtøkan millum føroyingar fyri fullveldinum, Pauli Ellefsen, at sjálvt 100 ára gamli Sambandsflokkurin fyri at hava lív lagað, føldi seg kroystan til at smoyggja illavornað orðið “sjálvstýrið” í stevnuskrá sína. Og gudhálpi mær um teir ikki eru við, nú kirkjan verður yvirtikin á ólavsøku. Og takk skulu teir hava fyri tað.
