Ólavur í Beiti
Undir aðalorðaskiftinum í gjár, tá ið frágreiðingin hjá vinnumálaráðharranum var til viðgerðar í tinginum, segði Finnbogi Arge m.a. viðvíkjandi lagaligum skattaskipanum, at farna mansaldur er skattabyrðin í framkomnum londum bara vorðin alsamt tyngri, men nú tykist, sum hon fer at lætna aftur, við tað at hugburðurin hjá politikarum og veljarum er við at broytast.
? Mong lond hava nú viðurkent vansarnar av høgum skattatrýsti. Breið tvørpolitisk undirtøka er fyri at lækka (serstakliga) vinnuskattin til at skunda undir vøkstur og íløguhug. Eisini í Norðurlondum, sum tykjast serstakliga viðkvom viðv. fríum flutningi av kapitali, og sum vita, at høgt skattatrýst styggir møguligar útlendskar íleggjarar.
Úr 49 niður í 12,5%
Og um gongdina í Føroyum, segði Finnbogi Arge, at fyrst í 90-árunum var vinnuskattaprosentið í Føroyum lækkað úr 49 niður í 22%. Tá var tað næstan 50% í Norðurlondum. Sum partur av Norðurlendska skattasamstarvinum kundu tey fata hetta stig sum at misnýta teirra skattarúm. Eftir samráðing varð føroyska vinnuskattaprosentið sett til 27%. Stutt eftir lækkaðu Norðurlond prosentið niður í nánd av tí føroyska.
? Vinnuskattaprosentið eigur fyrst at verða lækkað niður í 20% longu frá 1. januar 2000. Síðan niður í 12,5%, so skjótt tað er fíggjarliga og politiskt møguligt. Fordømi er um hetta, nú ES hevur loyvt Írlandi 12,5% frá 2005. Vanligi inntøkuskatturin átti at verðið lækkaður mið- og stigvíst. Ein góður máti er at bjóða frádrátt fyri at seta pening í føroysk partabrøv ? beinleiðis ella óbeinleiðis gjøgnum felagsgrunnar. Neyv útrokning eigur at verða gjørd, hvussu stórur hesin skattalætti verður, og nær hann verður settur í gildi.
Frálandafyritøkur
? Eisini eiga vit at fara at hugsa um at seta í verk eina skattaskipan fyri frálandafyritøkur, har keyparar og seljarar eru uttan fyri Føroyar, sum kundi líkst t.d. teirri íslendsku við 5% skatti.
? Fíggjarmálastýrið hevur tikið stig til, saman við vinnuni og Vinnumálastýrinum, at endurskoða vinnuskattalóggávuna, so at hon verður meira eggjandi fyri vinnuna. Landsstýrismaðurin í vinnumálum vil stuðla Fíggjarmálastýrinum í hesum, segði Finnbogi Arge m.a. í frágreiðing síni um búskaparvøkstur.
