Vinnan á altjóða pallin

Annika Olsen

www.annikaolsen.net

Fólkatingsvalevni fyri Fólkaflokkin

Vinnumenningin í Føroy­um hevur sum fortreyt, at vit alsamt megna at fram­leiða tær vørur og tænastur, ið altjóða marknaðurin vil hava, og at vit megna at geva kundanum dygdar­góðar vørur og tænastur til røttu tíð og til kapping­ar­føran prís. Vinnumenningin gagnar vinnulívinum og er fortreyt fyri framhaldandi búskaparligum vøkstri í Føroyum.

Føroyar eru frá náttúr­unnar hond ríkað við nógv­um og góðum tilfeingi. Umráðandi er, at fiska­stovn­arnir og sjótilfeingið verða umsitin á skila­góð­um og varligum grundar­lagi, so at vit ikki verða noydd til at seta bann fyri veiðu, eins og fleiri av grannalondunum, ella verða fyri altjóða útistongsli vegna ovur­nýtslu. Ístaðin má arbeiðast fyri at fáa enn meira burturúr hvørjum kilo, gagnnýta onnur fiskasløg, menna og gera brúk av biotøkni í framleiðsluni umframt tryggja betri gagnnýtan av hjávørum.

Samstarv og gransking innan vinnugreinar og fyri­tøkur um landamørk stim­brar nýskapan og menning av vørum og tænastum og gevur vinnuni neyðugt innlit í nýggja vitan, tøkni og rák á altjóða marknað­inum. Slík vitan er neyðug, tá føroyskar og útlendskar fyritøkur skulu taka stra­tegiskar avgerðir, og tá politisku karmarnir fyri vinnulívið í Føroyum skulu leggjast.

Sum matvørufram­leið­andi land er tað umráðandi fyri vinnulívið at fáa lætta og skjóta atgongd til teir marknaðir, har besti prís­urin fæst fyri vøruna. Handilsforðingar, tollgjøld og skamtan mugu ruddast burtur, so føroyska vinnulívið fær javnbjóðis møguleikar eins og onnur at kappast á altjóða markn­aðinum. Flutningsmøgu­leikarnir mugu betrast og økjast, so at kundin fær vøruna til røttu tíð og í røttu góðsku. Marknaðar­átøk uttanlanda skulu sjón­liggera føroyskar vørur og tænastur. Slík marknaðar­átøk skulu eisini kveikja áhugan hjá útlendska vinnulívinum at leita sær henda vegin at gera íløgur og samtøk og á tann hátt stimbra kappingarføri hjá føroyska vinnulívinum.

At opna dyr í Danmark, ES og út í umheimin til fyrimuns fyri føroyska vinnulívið, tað vil eg arbeiða fyri - eisini á Fólkatingi.