Hósdagin 13. september fara løgmaður og uttanríkisráðharrin at hava teirra árliga sínámillum fund. Fundurin verður í Vestmanna. Á skránni eru m.a. makrelósemjan og ynski um føroyskan limaskap í WTO. Løgmaður og uttanríkisráðharrin fara eisini at viðgera samskiftið millum donsku stjórnina og landsstýrið á uttanríkis- og trygdarpolitiska økinum, og hvussu Føroyar fáa betri møguleika at røkja egin áhugamál í millumtjóða felagsskapum.
Hósdagin skal uttanríkisráðharrin eisini á fund við Løgtingsins uttanlandsnevnd.
Í Danmark er Villy Søvndal komin nógv í fokus í hesum døgum, nú hann kunngjørdi, at hann leggur frá sær sum floksformaður – og stríð hevur longu tikið seg upp innanhýsis, um hvør skal taka yvir tungu uppgávuna, nú tølini hjá SF ikki eru so góð, sum tey hava verið.
