Hóast Javnaðarflokkurin, Tjóðveldi og Framsókn løgdu nógv fyri í mai mánaði fyri at fáa løgtingið at játta børnum í fátækaváða eyka fíggjarstyrk, so verður eingin hjálp veitt í ár.
- Í øllum førum er tað ikki ætlanin hjá somu flokkum, sum nú mynda landsstýrið, váttar Eyðgunn Samuelsen, landsstýriskvinna í almannamálum fyri Sosialinum.
Hon sigur, at arbeitt verður við málinum, men at tað verður innarbeitt í fíggjarlógina fyri næsta ár. Altso at eingin hjálp verður at heinta í ár.
Sonja Jógvansdóttir, løgtingskvinna, sigur, at hetta kemur óvart á seg, og hon staðfestir, at tað bara er ein spurningur um vilja, sigur hon við Sosialin.
- Vit hava allar tær neyðugu fortreytirnar fyri at basa barnafátækradøminum, og tað einasta sum manglar er viljin til at gera tað, sigur hon.
- At vit ikki langt síðani hava fingið skipanir, sum lyfta børn úr fátækt er skomm, men tað umber ikki okkum, sum nú sita í løgtinginum at sita hendur í favn.
Sonja Jógvansdóttir sigur, at áðrenn hetta árið er úti, skulu skipanir vera, sum lyfta øll børn úr fátækraváða, tí einki annað kann góðtakast í einum so ríkum landi sum okkara. Trýst á pílin undir myndini fyri at hoyra samrøðuna.
