Skal Smyril sigla úr Suðuroy ein tíma fyrr um morgunin?
Tað er ein spurningur, sum er reistur, nú Strandferðslan arbeiðir við at leggja ferðaætlanina av nýggjum.
Nýggjar reglar hava ført við sær, at nú er manningin á Smyrli tøk hvønn dag frá klokkan seks á morgni til klokkan 23.30 á kvøldi.
Hetta førir við sær, at tað ber til at umskipa ferðaætlanina, so at hon tænir fólkinum sum best.
Í tí sambandi kallaði Strandferðslan til almennan fund í gjárkvøldið, har fólk kundu siga sína hugsan um ferðaætlanina.
Men útgangsstøðið er, at Smyril siglur sama túratal, sum hann ger nú, tí enn er óvist, um játtanin til Strandferðsluna fer at hækka, so at hann kann sigla fleiri túrar.
Strandferðslan sigur, at tað kann vera, at niðurstøðan er, at ferðaætlanin er góð, sum hon er. Men talan kann eisini vera um at broyta hana fyri at tæna ferðafólki og vinnulívið sum best.
Strandferðslan hevur eina fatan av, at fólk eru vælnøgd við ferðaætlanina um vikuskiftið.
Men ein spurningur, sum er tikin upp, er, um Smyril skal leggja ferðaætlanina soleiðis, at tað skal bera til at ganga í skúla, ella at arbeiða í Havn, og samstundis búgva í Suðuroy.
Tað vil siga, at fólk sigla ímillum hvønn dag.
Strandferðslan heldur, at hetta kundi byrgt fyri, at fleiri fólk flyta av oynni, tá ið tey arbeiða, ella ganga í skúla í Havn.
Men tað merkir so, at Smyril skal sigla úr Suðuroy hvønn dag klokkan seks á morgni. Men so kann hann afturfyri sigla suðuraftur klokkan 16.30, so at fólk eru fyrr heima aftur um dagin.
Spurningurin er so um suðuroyingar eru sinnaðir til at fara upp ein tíma fyrr. Fyri at vera á á Smyrli klokkan seks á morgni, skulu tey flestu úr songini í seinasta lagi klokkan fimm á morgni, og summi enntá áðrenn tað.
Hetta er ein spurningur, Strandferðslan vil hava suðuroyingar at siga sína hugsan um.
Annars var semja á fundinum um, at Suðuroyingar vilja helst hava, at Smyril skal sigla tríggjar túrar hvønn dag, akkurát sum hann fer mánadag.
Ella sum onkur segði: Vit vilja hava fleiri mándagar um vikuna.
Men umboð fyri vinnulív, og fólk sum ferðast uttanlands, vilja hava, at tann seinasti túrurin úr Havn er heldur seinni um kvøldið, kanska klokkan 21.30, fyri at fólk, sum koma við tí seinasta flogfarinum, eisini sleppa suður sama dag, og fyri at tey, sum flyta fisk, hava størri møguleikar fyri at fáa rávøru til oynna at virka.
- Tað er neyðugt fyri at vinnulívið í Suðuroy skal vera á jøvnum føti við vinnulívið norðaneftir, siga umboð fyri vinnulívið.
Umboð fyri ferðavinnuna vóru eisini samd um, at tað var eitt stórt bakkast fyri ferðavinnuna, at Smyril misti ein túr mikudagar.
Men Strandferðslan vil fegin hava, at fólk siga sína hugsan um ferðaætlanina, og, hvørjar broytingar eiga at verða gjørdar fyri at ferðaætlanin skal tæna suðuroyingum so væl sum gjørligt.
So tað er bara at siga tína meining.
