Tá ið læknalesandi eru liðug at lesa á universiteti í Danmark, skulu tey út í turnus, út á sjúkrahús at arbeiða í eitt ár. Tað skal til fyri at fáa at koma víðari.
Tey søkja pláss og luttaka í lutakassi um plássini.
Men tey, sum fara í onnur lond at lesa til lækna, sleppa ikki við í hetta lutakastið. Í frægasta føri sleppa tey at standa niðast á listanum og kunnu fáa pláss, sum leypa av.
Úti við 20 føroyingar lesa til lækna í Pollandi, og føroyska heilsuverkið hevur roynt at funnið eina loysn fyri føroysku læknalesandi í Pollandi, so hesi kunnu fáa henda praktiska partin av útbúgvingini, og Tummas í Garði, varastjóri á Landssjúkrahúsinum væntar, at føroyska sjúkrahúsverkið fer at kunna bjóða teimum pláss í framtíðini. Hetta arbeiðið skulu læknalesandi hava fyri at kunna fyri at kunna fá útbúgvingina góðkenda.
Málið bleiv átrokandi í ár, tí tann fyrsti føroyingurin var í summar liðugur við teoretisku útbúgvingina á universitetinum í Pollandi, men áðrenn tað eydnaðist at finna honum pláss á sjúkrahúsi í danska ríkinum, valdi viðkomandi av øðrum orsøkum at flyta í eitt annað land.
Øðrvísi útbúgving
Polska læknaútbúgvingin er nógv øðrvisi enn danska/føroyska. Meðan tey enn eru á universiteti skulu tey út í praktikk, og fleiri av føroysku læknlaesandi í Polandi hava verið heima í summar og arbeitt á sjúkrahúsunum. Útbúgvingarnevndin hevur lagt arbeiði til rættis, alt eftir, hvussu langt tey eru komin í útbúgvingini.
Tummas í Garði sigur, at føroyska heilsuverkinum dámar væl, at føroyingar fara í onnur lond at fáa sær útbúgving. Tað gevur altjóða sambond, og læknarnir fáa sær so nógvar ymiskar sergreinir.
- Vit hava bara gott at bera polsku útbúgvingini, og tey eru fakliga væl fyri, sigur Tummas í Garði.
Umleið 60 føroyingar lesa til lækna í Danmark, og bæði føroyingar og danir koma til Føroya í turnus. Tí er ikki trot á læknum beint nú.
- Men vit gera alt, vit kunnu, fyri at fá tey úr Pollandi at koma henda vegin, sigur Tummas í Garði.
