Fyri trimum árum síðani løgdu Dimmalætting og Hestprent prentsmiðjurnar saman og stovnaðu í felag prentsmiðjuna Føroyaprent. Síðani tá er prentsmiðja støðugt útbygd, og í gjár var tann nýggjasta maskinan tikin í nýtslu.
Jon Hestoy, stjóri á Føroyaprent, sigur, at hendan íløgan fer at gera prentsmiðjuna føra fyri at kappast á jøvnum føti við allar prentsmiðjur í grannalondunum.
Talan er um eina maskinu frá Heidelbergverksmiðjuni.
- Hon hevur alla útgerð, ið hugsast kann, og vit vænta, at hon kann framleiða dupult so nógv sum tær báðar maskinurnar, sum vit hava vrakað, sigur Jon Hestoy.
Maskinan eitur Heidelberg SM74, og hon kann prenta í fimm litum og kann prenta 15.000 ørk um tíman.
Ætlanin hjá Føroyaprent er at koyra maskinuna í tveimum vaktarskiftum.
Føroyaprent leggur seg fyrst og fremst eftira t fáa fatur í prentið, sum verður prentað uttanlands, sigur Jon Hestoy. Hann vísir á, at so leingi, sum so stórur partur av føroyskum prentlutum verður prentaður uttanlands, er ikki neyðugt at tosa um útflutning av prentlutum – tí møguleikarnir fyri vøkstri eru stórir, bara tey fáa fatur á føroyskum prentlutum.
Tað var Jóannes Eidesgaard, løgmaður, sum á samkomu seinnapartin í gjár fekk heiðurin at tendra maskinuna – og fyrsti prentluturin var ein plakat hjá Edward Fuglø, “Manmade”.
Jon Hestoy var sum sera fegin um nýggju útbyggingina. Hann takkaði øllum starvsfólkunum, sum eru størsta aktivið hjá Føroyaprenti, kundum og øllum Føroya fólki, - ið lesur og nýtir tað, ið vit prenta, segði Jon Hestoy.
